Manchester United, Everton og félög í Sádi-Arabíu hafa áhuga á Wilfried Ndidi, sem er fáanlegur á tómbóluverði í sumar.

Talksport fjallar um málið, en vegna klásúlu í samningi miðjumannsins má hann fara frá Leicester á aðeins 9 milljónir punda í sumar í kjölfar þess að félagið féll úr ensku úrvalsdeildinni.

Þetta hyggjast áðurnefnd félög nýta sér. United hefur ekki eins mikið á milli handanna vegna þess að félagið er ekki í Evrópukeppni og Ndidi, sem hefur mikla reynslu úr ensku úrvalsdeildinni, gæti reynst góð lausn.

Ndidi spilaði 28 leiki í ensku úrvalsdeildinni á síðustu leiktíð og lagði upp fimm mörk.