Alan Brady, yfirmaður hjá írsku lögreglunni og einn þeirra sem rannsakað hefur hvarf Jóns Þrastar Jónssonar, segist telja að svarið í máli Jóns Þrastar sé að finna á Íslandi.

Fimm írskir lögreglumenn eru staddir hér á landi vegna rannsóknarinnar og munu írska og íslenska lögreglan alls taka skýrslur af 45 einstaklingum.

Sjá einnig: Var Jón Þröstur myrtur af launmorðingja sem fór mannavillt?

Jón Þröstur, fjögurra barna faðir, hvarf þann 9. febrúar 2019 eftir að hann sást yfirgefa Bonnington-hótelið í norðurhluta Dublin. Hann sást á öryggismyndavélum skammt frá hótelinu en síðan þá er ekkert vitað um ferðir hans.

Brady segir í samtali við RTE News, sem The Irish Sun vitnar til, að markmið lögreglu sé að ræða við einstaklinga sem kunna að vita eitthvað um afdrif Jóns Þrastar.

„Við teljum að hvað sem gerðist fyrir Jón hafi það gerst í Dublin, en svörin við því hvað gerðist kunna að leynast hér á Íslandi,” segir Brady og bætti við að aðstandendur Jóns hafi gengið í gegnum harm og þjáningar síðastliðið sex og hálft ár.

„Við erum hér til að reyna að finna svör fyrir þau. Engin fjölskylda ætti að þurfa að ganga í gegnum það sem þau hafa þurft að þola,” segir hann.

Umfjöllun The Irish Sun.