Thibaut Courtois, markvörður Real Madrid, viðurkennir að leikmenn liðsins séu enn að jafna sig eftir brottför Carlo Ancelotti.

Ancelotti gerði frábæra hluti sem stjóri Real í langan tíma en yfirgaf félagið í sumar og er Xabi Alonso tekinn við.

Real var ekki sannfærandi í vikunni í HM félagsliða er liðið gerði jafntefli við lið Al-Hilal frá Sádi Arabíu.

Belginn segir að það sé ekki auðvelt verkefni að venjast nýjum þjálfara og nýjum leikstíl og viðurkennir að það muni taka sinn tíma.

,,Við vorum með Carlo í fjögur ár og vorum vanir ákveðnum hlutum en nú þurfum við að aðlagast upp á nýtt,“ sagði Courtois.

,,Það er ekki eitthvað sem gerum á fjórum dögum, það gerist ekki strax. Við erum að horfa á myndbönd og tölum saman en með hverjum leik þá verður spilamennskan betri.“