Cecilía Rán Rúnarsdóttir er á lista ESPN yfir leikmenn 21 árs og yngri sem vert er að fylgjast með á EM í sumar.
EM í Sviss hefst eftir 12 daga og er fyrsti leikurinn milli Íslands og Finnlands. ESPN hitar upp fyrir mótið með þessari skemmtilegu umfjöllun og er Cecilía ein af aðeins fimm á listanum.
„Hún átti frábært tímabil á láni hjá Inter og var kosin besti markvörður Serie A eftir að hafa haldið hreinu í 10 leikjum af 23. Hún hjálpaði liði sínu að ná öðru sæti og þar með Evrópusæti,“ segir meðal annars í greininnni.
Aðrar á listanum eru Sydney Schertenleib í Sviss, Esmee Brugts í Hollandi, Ellen Wangerheim í Svíþjóð og Emilia Szymczak í Póllandi.
Cecilía, sem á að baki 19 A-landsleiki, var á láni hjá Inter frá Bayern Munchen á síðustu leiktíð en skiptir líklega endanlega yfir til ítalska félagsins.
