Efnt hefur verið til undirskriftasöfnunar til að mótmæla þeim áformum að reisa nokkur fjölbýlishús á lóð við Birkimel í vesturbæ Reykjavíkur þar sem nú stendur bensínstöð Orkunnar. Miðað við umræður á samfélagsmiðlum sýnist sitt hverjum en meðal þeirra sem lýsa ánægju sinni með að bensínstöðin þurfi að víkja er hinn þjóðþekkti sjónvarpsmaður Egill Helgason, í Facebook-færslu.

Eins og DV greindi frá í gær eru andmælin einkum á þeim grundvelli að áformin feli í sér of mikla þéttingu á ekki stærri lóð.

Hrinda af stað undirskriftalista gegn þéttingu á bensínstöðvarlóð í Vesturbænum – „Björgum Birkimel“

Í umræðum á samfélagsmiðlum fagna hins vegar sumir áformunum með vísan til sífellds húsnæðiskorts en þeir sem andmæla vísa, til viðbótar við að þéttingin sé of mikil, til þess að ekki sé gert ráð fyrir nægilega mörgum bílastæðum vegna þess fjölda íbúða sem eiga að vera í fyrirhuguðum húsum.

Egill tjáir sig ekki um þéttingaráformin á lóðinni sem slík heldur kýs að halda sig við fagurfræðina:

„Það er deilt um byggingu á Birkimelnum þar sem nú er bensínstöð. Hún er algjörlega forljót og þarf að hverfa. En svona leit þetta út þegar ég var strákur. Glæsilegur módernismi – bensínstöðin svona létt og falleg – held að Hannes Davíðsson hafi teiknað hana – og hið glæsilega nútímahótel fyrir aftan. Og bílarnir passa vel inn í umhverfið. Skiltið hógvært og flott – ekki svona lógóferlíki eins og maður sér í dag.“

Færslu Egils með mynd af bensínstöðinni eins og hún leit út á hans yngri árum má sjá hér fyrir neðan.