Kylian Mbappe íhugaði að leggja landsliðsskóna á hilluna seint 2024 eftir að hafa lent í rifrildum við landsliðsþjálfara Frakka, Didier Deschamps.

Þetta fullyrðir blaðamaðurinn Romain Molina en Mbappe var í tvígang ekki valinn í franska landsliðshópinn 2024.

Samkvæmt Molina var Mbappe sterklega að íhuga að hætta að gefa kost á sér fyrir fullt og allt en það var hann sjálfur sem neitaði kalli Deschamps af persónulegum ástæðum.

Talað var um á þeim tíma að Deschamps væri ekki að velja Mbappe í hópinn en Molina segir að það hafi verið ákvörðun sóknarmannsins að mæta ekki í verkefnin.

Áreiti ku hafa haft áhrif á þessa ákvörðun Mbappe sem fann fyrir lítilli ást frá stuðningsmönnum Frakklands sem eru svo sannarlega kröfuharðir og er hann helsta stjarna landsliðsins.

Eftir samtal við Deschamps ákvað Mbappe að gefa landsliðinu séns á ný og verður hann í eldlínunni á HM 2026 á næsta ári.