Það eru fáir ef einhverjir sem vita hver Hichman Bukhari er en hann er fyrrum lífvörður portúgölsku stórstjörnunnar Cristiano Ronaldo.

Bukhari opnaði sig aðeins um samband sitt við Ronaldo en hann vann með leikmanninum er hann lék með Real Madrid á Spáni.

Hann staðfestir á meðal annars að það sé afskaplega vel borgað starf að vinna fyrir Ronaldo og nokkuð þægilegt heilt yfir þar sem Ronaldo er sjaldan ef einhvern tímann í lífshættu.

Bukhari segist hafa fengið um fjórar milljónir króna á mánuði fyrir sín störf en hann einbeitir sér í dag að öðrum verkefnum.

,,Varðandi Ronaldo þá vann ég fyrir hann í um tvö ár og það var ekki beint erfitt verkefni því það er enginn að reyna að myrða hann og þá fær hann ekki morðhótanir,“ sagði Bukhari.

,,Hann fékk vissulega hótanir frá stuðningsmönnum en var hótað því að þeir myndu ræna húsið hans.“

,,Við þurfum alltaf að vera með alla hluti á hreinu í þessari vinnu og hvar við verðum og hvenær. Við þurfum alltaf að vera meðvitaðir um að líf okkar gætu verið í hættu.“

,,Ronaldo er besti yfirmaður sem ég hef haft á mínum starfsferli.“