Pep Guardiola, stjóri Manchester City, hefur beðið ungstirnið Lamine Yamal afsökunar og segir að það sé ekki hægt að bera hann saman við fyrrum undrabarnið, Lionel Messi.

Messi er einn besti leikmaður sögunnar ef ekki sá besti en hann vann með Guardiola hjá Barcelona á sínum tíma er hann hóf sinn feril sem atvinnumaður.

Yamal er oft líkt við Messi en sá fyrrnefndi er 17 ára gamall og er þrátt fyrir það talinn einn öflugasti vængmaður heims.

Guardiola er að sjálfsögðu mikill aðdáandi Yamal en segir að það sé ekki hægt að bera hann saman við þann argentíska.

,,Sannleikurinn er sá að við hjá Barcelona erum heppnir að hafa fundið strák sem er svo efnilegur,“ sagði Guardiola.

,,Ég mun ekki segja að hann sé eins og Leo, ég biðst afsökunar en Leo fyrir mér er einstakur og enginn mun verða eins og hann. Það er ómögulegt.“