Það verður ekki dýrt að semja við sóknarmanninn Timo Werner í sumar en hann er á mála hjá RB Leipzig.

Ferill Werner hefur verið á mikilli niðurleið undanfarin ár en hann hefur spilað með Tottenham á láni undanfarin tvö tímabil.

Werner stóðst engan veginn væntingar hjá Tottenham sem vildi ekki kaupa hann endanlega og vill Leipzig ekki sjá hann næsta vetur.

Werner kostaði Chelsea 47 milljónir punda fyrir aðeins þremur árum þar sem hlutirnir gengu ekki upp og var hann fljótt seldur aftur til Leipzig.

Nú er greint frá því að Leipzig vilji aðeins þrjár milljónir punda fyrir Werner í sumar sem er í raun ótrúlega lítil upphæð miðað við markaðinn í dag.

Werner er enn aðeins 29 ára gamall og var þýskur landsliðsmaður en hann hefur átt erfitt með að finna taktinn í ensku úrvalsdeildinni.