A landslið kvenna mætti Frakklandi á Laugardalsvelli í gær, í lokaumferð Þjóðadeildar kvenna. Óhætt er að segja að sterkur vindur hafi haft mikil áhrif á leikinn en engu að síður áttu bæði lið góða spilkafla.

Um var að ræða fyrsta leikinn á nýjum hybrid-velli í Laugardalnum.

Jafnræði var með liðunum í fyrri hálfleik og þrátt fyrir nokkrar öflugar marktilraunir á báða bóga var markalaust þegar flautað var til hálfleiks.

Í síðari hálfleik sótti franska liðið undan vindi og sókn þeirra bar ávöxt á 74. mínútu þegar fyrsta mark leiksins leit dagsins ljós. Þrátt fyrir ágætar tilraunir íslenska liðsins til að jafna leikinn náðu Frakkar að bæta við öðru marki á 85. mínútu. Þar við sat og tveggja marka franskur sigur staðreynd.

Kristinn Svanur Jónsson fór á leikinn og fangaði augnablikið með myndavélinni.