Lögreglan á höfuðborgarsvæðinu greinir frá því að karlmaður sem fannst látinn í sjónum út af Örfirisey eftir hádegi í dag sé talinn vera sami maður og hafði verið saknað frá því síðdegis í gær. Um er að ræða erlendan ríkisborgara á þrítugsaldri en tilkynnt var um hvarf hans um hálffimmleytið í gær. Maðurinn var í sjósundi og er talinn hafa örmagnast. Viðamikil leit hófst strax í gær með þátttöku fjölda viðbragðsaðila. Leitað var fram á kvöld án árangurs en leit hófst að nýju eftir hádegi og lauk þegar maðurinn fannst látinn.
