Undir lok síðasta mánaðar var undirritaður samningur milli ríkisins og Vestmannaeyjabæjar um framlag þess fyrrnefnda til listaverks sem stendur til að koma fyrir á fjallinu Eldfelli á Heimaey til að minnast loka eldgossins 1973. Sams konar samningur var gerður á síðasta ári en framlag ríkisins í nýja samningnum er 10 milljónum króna hærra en í þeim eldri.
Höfundur verksins er myndlistarmaðurinn Ólafur Elíasson en verkið hefur verið umdeilt í Eyjum vegna kostnaðar og þess rasks sem það mun óneitanlega hafa í för með sér á Eldfelli. Talað hefur verið um að heildarkostnaðurinn verði um 200 milljónir króna.
Umdeilt 200 milljóna króna listaverk á að rísa í Vestmannaeyjum
Hlutur ríkisins hefur verið eyrnamerktur gerð göngustígs upp að verkinu en stígurinn verður þó skilgreindur sem hluti af því.
Með fundargerð síðasta fundar bæjarráðs Vestmannaeyja eru birtir samningarnir tveir sem gerðir hafa verið milli ríkisins og bæjarins vegna verksins.
Eldri samningurinn var undirritaður í maí 2024 af Írisi Róbertsdóttur bæjarstjóra í Vestmannaeyjum og Liju Dögg Alfreðsdóttur þáverandi menningar- og viðskiptaráðherra. Í samningnum kemur fram að menningar- og viðskiptaráðuneytið hafi eftirlit með framkvæmd samningsins og heildargreiðsla ráðuneytisins til bæjarins verði 50 milljónir króna án virðisaukaskatts. Í samningnum segir að greiðslu skuli greiða með eingreiðslu við undirritun samnings. Þó er settur sá fyrirvari í samningum að lækki fjárheimildir til viðkomandi málefnasviðs og málaflokks í fjárlögum sem hafi í för með sér breytta fjárveitingu til verkefnisins, skuli samningsaðilar taka upp viðræður um aðlögun verkefnisins að breyttri fjárveitingu.
Framlagið í eldri samningnum, sem rann út um áramótin, virðist ekki hafa verið greitt út en aldrei hefur verið rætt um það opinberlega að ríkið tvöfaldi framlag sitt. Það sem hefur breyst hins vegar hjá ríkinu eftir að eldri samningurinn var gerður er að menningar- og viðskiptaráðuneytið hefur verið lagt niður og ný ríkisstjórn hefur tekið við völdum.
Nýrri samningurinn var undirritaður 30. apríl síðastliðinn en Bryndís Hlöðversdóttir ráðuneytisstjóri atvinnuvegaráðuneytisins undirritaði hann af hálfu ríkisins en það ráðuneyti hefur tekið við málinu.
Samkvæmt samningnum mun ráðuneytið leggja bænum til 60 milljónir króna án virðisaukaskatts. Eins og í eldri samningnum segir að greiðslu skuli greiða með eingreiðslu við undirritun samnings og sömu fyrirvarar eru settir.
Í nýja samningnum er þess ekki getið hvers vegna upphæðin sem ríkið leggur bænum til hefur hækkað um 10 milljónir króna á einu ári og heldur er ekkert minnst á það í fundargerð bæjarráðs Vestmannaeyja.
