Jón Óttar Ólafsson fyrrum lögreglumaður hefur verið borinn þungum sökum undanfarið. Í nýlegri umfjöllun Kveiks kom fram að Jón Óttar og samstarfsmaður ráku fyrirtæki sem stóð fyrir umfangsmiklum aðgerðum sem fólust í að hafa víðtækt eftirlit með ferðum fjölda fólks. Var það gert gegn greiðslu frá Björgólfi Thor Björgólfssyni kaupsýslumanni. Jón Óttar hefur einnig verið ásakaður um að hafa stolið miklu magni gagna frá embætti sérstaks saksóknara, þar sem hann starfaði. Hann hefur hingað til ekki viljað tjá sig opinberlega en gerir það nú í viðtali við vefmiðilinn Brotkast. Segir Jón Óttar að hann og samstarfsmaður hans hafi verið lagðir í gildru af Ólafi Þór Haukssyni sem gegndi embætti sérstaks saksóknara en varð héraðssaksóknari þegar það embætti tók við verkefnum þess fyrrnefnda.
Frosti Logason fjölmiðlamaður ræðir við Jón Óttar í þættinu Spjallið á Brotkasti. Viðtalið verður birt á morgun en Frosti hefur birt á samfélagsmiðlum stutt brot úr því þar sem Jón Óttar sakar Ólaf Þór um þetta.
Málið snýst í megindráttum um það að Jón Óttar stofnaði árið 2011 ásamt Guðmundi Hauki Gunnarssyni lögfræðingi, sem er látinn, fyrirtækið PPP en þeir höfðu starfað saman hjá sérstökum saksóknara. Fyrst um sinn ráku þeir fyrirtækið samhliða starfi sínu en hættu síðan störfum eftir að hafa verið sakaðir um að stela gögnum og selja þau. Árið 2012 réð Björgólfur Thor fyrirtækið til að njósna um fjölda manns sem komu að málsókn á hendur honum. Fengu Jón Óttar og Guðmundur m.a. starfandi lögreglumann sér til aðstoðar. Ekki var þó upplýst um tiltækið fyrr en nýlega af fréttaskýringarþættinum Kveik.
Í kjölfarið var fjallað um það í Kastljósi að PPP hefði haft undir höndum stolin gögn frá sérstökum saksóknara og frá lögreglunni á höfuðborgarsvæðinu. Ólafi Þór sagði ljóst að gögnin hefðu alls ekki átt að fara út fyrir veggi embættanna og málið hefur mikið verið rætt á Alþingi og var tekið fyrir í dag í stjórnskipunar- og eftirlitsnefnd. Formaður Landsambands lögreglumanna hefur sagt stéttina vera í áfalli bæði yfir þessu máli og njósnamálinu.
Morgunblaðið hefur hins vegar upplýst að Ólafur Þór gerði samning við Jón Þór og Guðmund eftir að þeir stofnuðu PPP um að fyrirtækið myndi sinna rannsókn máls sem þeir höfðu verið að vinna að sem starfsmenn embættisins. Var Ólafur Þór meðvitaður um tilkomu PPP og segir ekkert hafa verið athugavert við umræddan samning. Síðar kærði Ólafur Þór Jón Óttar og Guðmund fyrir gagnaleka og brot á trúnaðarskyldu en ríkissaksóknari felldi málið niður.
Lögreglunni á Suðurlandi hefur verið falin rannsókn á málum sem snúa að PPP.
Jón Óttar mun eins og áður segir ræða málið frá sinni hlið í viðtali við Frosta Logason sem verður birt á morgun en í því broti sem þegar hefur verið birt segir hann Ólaf Þór hafa leitt hann og Guðmund í gildru með þessum samningi. Hann fullyrðir að áður en samningurinn hafi verið undirritaður hafi Ólafur Þór verið búin að ákveða að leggja kæruna fram:
„Hann var búinn að ákveða að kæra okkur þá.“
Aðspurður hvort Ólafur Þór hafi með þessum hætti leitt þá tvímenningana í gildru segir Jón Óttar:
„Já, hann gerir það.“
