Rekstrarstöðvun er sögð yfirvofandi hjá PCC BakkaSilicon hf. á Húsavík en fyrirtækið framleiðir kísilmálm sem seldur er til útlanda. Kári Marís Guðmundsson, forstjóri fyrirtækisins, segir í samtali við Morgunblaðið í dag að útlitið sé mjög dökkt.

„Staðan er mjög erfið og þung. Markaðirnir eru ákaflega daprir og verðið er mjög lágt og hefur lækkað það sem af er þessu ári. Við erum að glíma við tiltölulega háan kostnað, verksmiðjan er frekar ný, en aðalmálið er að markaðirnir eru skelfilegir,“ segir hann við Morgunblaðið.

Í frétt blaðsins er greint frá því að Kári hafi gengið á fund byggðarráðs Norðurþings fyrir skemmstu og gert grein fyrir erfiðri stöðu fyrirtækisins. Starfsmenn eru nú 130 en fyrirtækið skapar einnig afleidd störf á svæðinu og því yrði það mikið högg ef starfsemi myndi leggjast af.

„Ef ekk­ert batn­ar á næstu vik­um er ekk­ert annað í stöðunni en að klára það hrá­efni sem fyr­ir ligg­ur og taka síðan ein­hvers kon­ar rekstr­ar­stöðvun, en eng­in end­an­leg ákvörðun hef­ur verið tek­in um það. En út­litið er mjög dökkt,“ seg­ir Kári í viðtalinu. Hann segir einnig að tollastríð Trumps Bandaríkjaforseta hafi ekki hjálpað til og samkeppni frá Kína sé heldur ekki að hjálpa fyrirtækinu.