Hrollvekjandi uppgötvun við húsleit í yfirgefnu verksmiðjuhúsnæði í Neuwegersleben í Þýskalandi er sögð benda til þessa að Madeleine McCann, sem hvarf í Praia da Luz í Portúgal árið 2007 í sumarfríi með fjölskyldu sinni, sé látin. Þessar upplýsingar koma fram í nýrri heimildarmynd Channel 4, „Maddie: The Unseen Evidence“, sem fjallar um rannsóknina.
Umrætt verksmiðjuhúsnæði var í eigu þýska níðingsins Christian Brueckner sem lengi hefur verið sá sem helst er grunaður um að bera ábyrgð á hvarfi McCann. Húsleitin fór fram árið 2016 en aldrei hefur verið greint frá henni fyrr en nú. Varpar hún ljósi á hvers vegna yfirvöld eru svo sannfærð um aðild Brueckner að málinu.
Við leitina fundust meðal annars barnaklæði, leikföng, grímur, ólögleg skotvopn og efni sem talið er tengjast barnaníði. Sérstaklega vakti athygli harður diskur og minnislyklar sem voru grafnir undir hræi hunds sem var í eigu Brueckners; á þeim fundust myndir og skrif sem lýsa viðurstyggilegri þráhyggju Brueckner gagnvart börnum.
Rannsóknin leiddi einnig í ljós að Brueckner hafði átt í samskiptum við aðra barnaníðinga í gegnum netið, þar sem hann lýsti sjúkum fantasíum um að ræna og misnota börn.
Þá fundust einnig skjöl sem staðfesta dvöl hans í Praia da Luz á þeim tíma sem Madeleine hvarf sem og gögn sem staðfesta að hann var á tiltekinni tónlistarhátíð á Spáni árið 2008 en þar hefur vitni sagt að Brueckner hafi hreykt sér af aðild sinni að málinu.
Þá er einnig fullyrt að eitthvað hafi fundist sem hafi sannfært rannsakendur um að McCann hafi látist skömmu eftir að hún var brottnumin.
Þrátt fyrir þessi gögn hefur Brueckner ekki verið ákærður í tengslum við hvarf Madeleine McCann og neitar hann allri aðild að málinu. Þýsk yfirvöld halda þó áfram rannsókn sinni og eru vongóð um að Brueckner verði formlega ákærður í nánustu framtíð.
Hann afplánar nú sjö ára fangelsisdóm fyrir að nauðga bandarískri konu á áttræðisaldri á Algarve-svæðinu í Portúgal, ári áður en McCann hvarf. Að óbreyttu mun hann losna úr fangelsi síðar á þessu ári.
