Á myndinni sem fylgir þessari frétt má sjá Sigurbjörgu Jónsdóttur í öngum sínum úti á gangstétt með eigur sínar í pokum eftir að hún var fyrr í dag borin út úr íbúð í fjölbýlishúsi, í Bríetartúni 20, sem er í eigu Félagsbústaða en ógnarástand hefur ríkt í húsinu vegna ofbeldis og skemmdarverka af hálfu annarrar konu sem býr þar. Hvað tekur við hjá Sigurbjörgu og hvar hún mun gista í nótt er óljóst á þessu stigi.
Eins og DV greindi ítarlega frá í morgun um það leyti sem útburðurinn var að eiga sér stað þá snýst málið um að Sigurbjörg hætti að greiða leigu af íbúðinni í því skyni að knýja það í gegn að fá flutning í aðra íbúð á vegum Félagsbústaða. Sigurbjörg hefur eins og aðrir íbúar í stigaganginum orðið fyrir skemmdarverkum, ítrekuðu ónæði, þjófnuðum og ofbeldi af hálfu konu sem býr í stigaganginum og heldur nágrönnum sínum í raun í heljargreipum. Umrædd kona hefur margoft komist í kast lögin vegna meðal annars þjófnaða og skemmdarverka.
Eins og Sigurbjörg greindi frá í samtali við DV í morgun var þó alvarlegasta brotið sem hún varð fyrir af hálfu konunnar mjög alvarleg árás sem konan tók þátt í, ásamt fleirum, árið 2023. Sigurbjörg tjáði DV að hún hafi gripið til þess örþrifaráðs að hætta að borga leigu til að losna undan konunni og fá flutning í aðra íbúð þar sem ómögulegt hafi verið að ná sambandi við Félagsbústaði sem hafi ekki fyrr en þá haft samband við hana. Segir Sigurbjörg að krafa um útburð hafi komið fljótlega og henni aðeins verið gefinn tveggja daga fyrirvari.
Ljóst er að Sigurbjörg er bókstaflega á götunni og hvað tekur við er alls óvíst. Annar íbúi í húsinu sagði við DV á meðan útburðinum stóð:
„Þetta er viðbjóður. Ég veit ekki hvar hún er að fara að sofa í nótt, líklega á götunni, nema hún komist inn í Konukot.“
