Fimm manneskjur á fertugsaldri, fjórir karlar og ein kona, hafa verið ákærð í tengslum við stórfellda kannabisræktun.

Einn karlanna er ákærður fyrir stórfellt fíkniefnabrot með því að hafa þriðjudaginn 29. júní 2021 haft í vörslu sinni, í sölu- og dreifingarskyni, samtals 116 kannabisplöntur, samtals 1.645 g af kannabislaufum og stönglum og samtals 9.897,54 g af maríhúana. Er hann jafnframt ákærður fyrir að hafa ræktað plönturnar.

Annar maður er ákærður fyrir hlutdeild í stórfelldu fíkniefnabroti með því að hafa lagt til búnað sem notaður var við ræktunina og framleiðslu fíkniefnanna sem tilgreind eru hér að framan. Er hann sagður hafa útvegað búnað frá Hamptækni ehf og leigt áðurnefnda manninum búnaðinn í því skyni að rækta kannabisplöntur. Hafi honum ekki dulist í hvaða skyni búnaðurinn var nýttur.

Þrjú önnur, tveir karlar og ein kona, eru síðan ákærð fyrir hlutdeild í stórfelldu fíkniefnabroti með því að hafa aðstoðað fyrstnefnda manninn við að klippa niður kannabisplönturnar, gegn greiðslu af óþekktu tagi.

159 plöntur til viðbótar

Fyrstnefndi maðurinn er síðan ákærður fyrir að hafa haft miðvikudaginn 30. júní 2021 í vörslu sinni 159 kannabisplöntur og fyrir að hafa um nokkurt skeið ræktað plönturnar.

Krafist er upptöku af gífurlegu magni af kannabisplöntum, kannabisefnum og búnaði til kannabisræktunar.

Málið verður þingfest fyrir Héraðsdómi Reykjavíkur þann 6. maí næstkomandi.