Viðar Örn Kjartansson gæti farið frá Maccabi Tel Aviv á næstu dögum eða vikum samkvæmt heimildum DV. Lið í þýsku úrvalsdeildinni sýna áhuga á að kaupa Viðar sem hefur raðað inn mörkum í Ísrael. Hann er eftirsóttur biti og gæti endað í Þýskalandi á næstu dögum. Sagt er að Maccabi fari fram á sjö milljónir evra fyrir þennan öfluga leikmann.

Íslenski varnarmaðurinn Ragnar Sigurðsson leitar sér að nýju liði en hann hefur undanfarið verið á láni hjá Krasnodar í Rússlandi. Þar hafa Ragnar og allir aðrir leikmenn liðsins ekki fengið laun sín greidd síðustu mánuði. Ragnar er samningsbundinn Fulham en þangað fer hann líklega ekki. Ragnar leitar sér því að nýju liði svo hann komist í sitt besta form fyrir heimsmeistaramótið í Rússlandi. Ragnar hefur verið orðaður við FC Kaupmannahöfn í Danmörku auk liða víða um Evrópu. Ljóst má vera miðað við frammistöðu Ragnars með íslenska landsliðinu að slegist verður um starfskrafta hans.

Tveir íslenskir landsliðsmenn gætu yfirgefið lið sín í næstefstu deild Englands. Hörður Björgvin Magnússon hefur fengið að spila mikið með Bristol City síðustu vikur en Rostov í Rússlandi reynir nú að kaupa hann. Rostov vildi Hörð síðasta sumar en pappírarnir fóru ekki í gegn á réttum tíma. Möguleiki er á að hann fari nú og þá gæti Birkir Bjarnason farið frá Aston Villa. Staða hans hefur verið erfið en góð innkoma í síðasta leik gæti breytt stöðu hans. Birkir gæti fengið stærra hlutverk á næstunni og haldið áfram að spila fyrir risann í Birmingham.