Chelsea og Manchester United eru sögð hafa áhuga á því að fá til sín ungstirnið Abubacarr Sedi Kinteh frá norska félaginu Tromsö.
Þessi 19 ára gamli miðvörður gekk til liðs við Tromsö í mars á síðasta ári eftir að hafa heillað á reynslu frá Academy Mawade Wade. Hann skrifaði í kjölfarið undir samning til ársins 2029, en frammistaða hans hefur þegar vakið athygli stærri félaga.
Kinteh, sem er örvfættur og þekktur fyrir mikinn hraða, lék 22 leiki á sínu fyrsta tímabili og skoraði eitt mark. Hann hefur einnig þreytt frumraun sína fyrir landslið Gambíu.
Samkvæmt Daily Mail eru bæði Chelsea og Manchester United áhugasöm um að tryggja sér þjónustu varnarmannsins. Chelsea er sagt sérstaklega áhugasamt, ekki síst eftir að hafa misst af Jeremy Jacquet til Liverpool.
Tromsö vill halda í leikmanninn en ljóst er að áhuginn frá ensku stórliðunum gæti sett pressu á norska félagið í sumar.
