Fyrrverandi knattspyrnustjóri Manchester United, Ruben Amorim, er sagður líklegur til að taka við sem stjóri portúgalska stórliðsins Benfica fyrir næstu leiktíð.
Amorim var rekinn frá United í janúar eftir 14 mánaða dvöl á Old Trafford, þar sem árangurinn stóð ekki undir væntingum þrátt fyrir að miklar vonir hafi verið bundnar við hann eftir tíð hans með Sporting í heimalandinu.
Amorim stýrði United í 63 leikjum og vann 25 þeirra, gerði 15 jafntefli og tapaði 23 sinnum. Michael Carrick tók við liðinu í kjölfarið og hefur leitt það til fjögurra sigra í röð.
Samkvæmt ESPN er gert ráð fyrir að núverandi stjóri Benfica, goðsögnin Jose Mourinho, láti af störfum næsta sumar og taki við portúgalska landsliðinu eftir HM 2026. Í kjölfarið er Amorim sagður helsti kandídatinn til að taka við hjá Benfica, en hann ku njóta mikils stuðnings á meðal stjórnarinnar þar.
Amorim hefur áður stýrt bæði Sporting og Braga við afar góðan orðstýr, á tvo meistaratitla til að mynda. Hann hefur þó einnig viðurkennt að hafa alist upp sem stuðningsmaður Benfica, þrátt fyrir að hafa síðar stýrt erkifjendunum í Lissabon.
