Ríflega 40 ábendingar og kvartanir höfðu borist Umhverfisstofnun á sunnudag og fram að miðjum degi á mánudag vegna stækrar brunalyktar frá kísilveri United Silicon í Helguvík. Fyrirtækið hefur ekki brugðist við bréfi Umhverfisstofnunar þar sem farið var fram á að fyrirtækið gerði tafarlausar úrbætur í mengunarmálum, ellegar yrði því lokað. Frestur til að svara bréfinu rennur út á morgun, miðvikudag.

Íbúar í Reykjanesbæ hafa orðið varir við mikla mengun frá fyrirtækinu undanfarna daga. Mengun sem þeir lýsa sem stækri brunalykt. „Í gær bárust 22 ábendingar eða kvartanir en í dag eru þær orðnar 19,“ sagði Sigrún Ágústsdóttir, sviðsstjóri hjá Umhverfisstofnun, í samtali við DV eftir hádegi í gær, mánudag. Á Facebook mátti glöggt sjá að íbúar hafa fengið nóg. „Erum búin vera að kafna, bæði í gær og í dag,“ skrifar einn íbúi. Annar bætti við: „Ég þurfti að loka öllum gluggum út af brunastybbu sem ég vaknaði við í nótt. Þetta er engan veginn boðlegt, þessi yfirgangur United Silicon.“ Fleiri taka í sama streng.