Florian Wirtz verður ekki með Liverpool í næsta leik liðsins gegn West Ham eftir að hafa meiðst í upphitun fyrir sigurinn gegn Nottingham Forest.

Þýski miðjumaðurinn fann fyrir meiðslum skömmu fyrir leik og var því tekinn út úr hópnum á síðustu stundu. Óvíst er hversu lengi hann verður frá keppni.

Arne Slot, knattspyrnustjóri Liverpool, segir stöðuna enn óljósa. „Á þessari stundu veit ég ekki hvenær Flo verður aftur klár,“ sagði Slot.

Hann bætti við. „Yfirleitt þegar ég segi þetta, þá veit ég svarið en vil ekki deila því. En í þetta skiptið veit ég það í raun og veru ekki.“

Þetta er áfall fyrir Liverpool sem hefur reitt sig á Wirtz á tímabilinu, en hann hefur verið einn af lykilmönnum liðsins. Nú þarf Slot að treysta á aðra leikmenn í miðjunni á meðan beðið er eftir frekari upplýsingum um meiðslin.