Rekstrarniðurstaða Knattspyrnusambands Íslands á árinu 2025 eftir greiðslur til aðildarfélaga er hagnaður sem nemur kr. 32.629.666

Rekstrartekjur KSÍ árið 2025 námu rúmlega 2,3 milljörðum króna, 13% umfram áætlun, þar sem styrkir frá UEFA og FIFA vógu þyngst. Rekstrargjöld voru 2,24 milljarðar króna, eða 14% yfir áætlun, þar sem kostnaður við lokamót EM kvenna er helsti áhrifaþátturinn.

Skrifstofu- og rekstrarkostnaður KSÍ hækkar um 14 milljónir á milli ára og var 462 milljónir króna á síðasta ári. Kostnaður við landslið voru rúmur 1,1 milljarður en var 933 milljónir árið á undan.

Laun og launatengd gjöld skrifstofu voru 347 milljónir og hækka um 14 milljónir á milli ára.

Rekstur Laugardalsvallar skilaði áfram tapi og hækkaði m.a. vegna aukins kostnaðar við endurnýjun leikflatar Laugardalsvallar með nýju hybrid grasi. KSÍ vinnur nú að nýjum rekstrar- og þjónustusamningi við Reykjavíkurborg á vettvangi Þjóðarleikvangs ehf og bindur KSÍ vonir við nýjan og endurbættan samning sem tekur mið af breyttum rekstrarforsendum Laugardalsvallar með tilkomu nýs hybrid gras með undirhita, sem og aukins rekstrarkostnaðar á framkvæmdatíma.

Þá var úthlutað til aðildarfélaga um 107 m.kr., auk framlags frá UEFA fyrir Club Youth Development.

Lögð er fram rekstraráætlun sem gerir ráð fyrir rúmlega 2 m.kr. hagnaði árið 2026.

Þær breytingar sem hafa orðið frá fyrra ári á tekjuhlið sambandsins eru eftirfarandi:

Tekjufærslur ákveðinna verkefna á vegum UEFA eru ekki lengur heimilar, þar sem umrædd verkefni verða hér eftir eignfærð.
A-landslið karla féll í C-deild Þjóðadeildar sem þýðir mun lægri tekjur til sambandsins.
Tekjur frá PUMA styrktaraðila sambandsins lækka vegna breytinga á nýjum samningi þar sem fastar greiðslur lækka, en árangurstengdar greiðslur hækka á móti.

Handbært fé KSÍ 31.desember 2025 stóð í 492 m.kr. UEFA mælir með að knattspyrnusambönd séu með 20-40% af veltu sambandanna í lausafé, sem gerir 400 – 800 m.kr.