Diego Simeone fagnaði vel og innilega þegar Atlético Madrid burstaði Barcelona 4-0 á heimavelli í fyrri leik liðanna í undanúrslitum spænska bikarsins.

Argentínski þjálfarinn vakti athygli þegar hann hélt upp þremur fingrum í átt að hinum 18 ára Lamine Yamal eftir að Ademola Lookman skoraði þriðja markið. Simeone lét ekki þar við sitja heldur hljóp niður hliðarlínuna í mikilli gleði á meðan lið hans keyrði yfir Börsunga í fyrri hálfleik, þar sem öll fjögur mörkin komu.

Sigurinn setur Atlético í afar vænlega stöðu fyrir seinni leikinn og liðið er nú með annan fótinn í úrslitum. Þar bíður annað hvort Real Sociedad eða Athletic Bilbao, nema Barcelona takist að framkvæma kraftaverk á heimavelli í seinni leiknum.

Barcelona taldi sig hafa minnkað muninn þegar Pau Cubarsí skoraði, en markið var dæmt af eftir átta mínútna VAR-skoðun. Seinkunin stafaði af bilun í hálfsjálfvirku rangstöðukerfi vegna mikils fjölda leikmanna í teignum og þurftu dómarar því að draga línur handvirkt.

Antoine Griezmann, Ademola Lookman og Julián Álvarez skoruðu mörk Atlético auk þess sem Eric García varð fyrir því óláni að skora sjálfsmark. Kvöldið versnaði enn fyrir García þegar hann fékk beint rautt spjald undir lok leiks fyrir harða tæklingu á Alex Baena.

„Ég held að fólkið okkar þurfi svona kvöld,“ sagði Simeone eftir leik.