Carlos Vicente hefur ákveðið að ganga til liðs við Birmingham og hafna þar með Ajax. Þetta kemur fram í hollenskum miðlum.

Spænski kantmaðurinn er væntanlegur til Birmingham á mánudag, þar sem hann mun skrifa undir samning og fá hærri laun en hann hefði fengið í Amsterdam.

Vicente kemur frá Deportivo Alaves. Birmingham situr í 13. sæti ensku B-deildarinnar eftir 29 leiki og er sex stigum frá umspilssæti. Félagið er stórhuga, en Tom Brady er einn eigenda þess.

Íslenski landsliðsmaðurinn Willum Þór Willumsson er á mála hjá Birmingham. Það var Alfons Sampsted einnig þar til um helgina, en þá gekk hann í raðir Go Ahead Eagles í Hollandi.