Arsenal fylgist grannt með varnarmanninum Victor Valdepenas hjá Real Madrid.

Valdepenas er 19 ára gamall og lék sinn fyrsta leik með aðalliði Real Madrid í síðasta mánuði. Hann er talinn afar efnilegur og sagður eiga bjarta framtíð fyrir sér.

Samkvæmt spænskum miðlum hafa fulltrúar Arsenal fylgst með þróun hans, en fleiri stórfélög í Evrópu eru einnig sögð hafa áhuga á spænska ungliðanum.

Arsenal vill bæta við sig ungum og fjölhæfum varnarmanni, en líklegt er talið að félagið bíði fram á sumargluggann með slíkt skref. Valdepenas er sérstaklega áhugaverður kostur þar sem hann getur bæði leikið í vinstri bakverði og í miðverði.

Hann lék sinn fyrsta leik fyrir Real Madrid gegn Alavés í vinstri bakverði og var á vellinum í 78 mínútur. Eftir leikinn skrifuðu liðsfélagar hans á treyjuna, sem hann segist ætla að setja í ramma og hengja upp í herberginu sínu.

„Þetta er draumur, draumur hvers barns,“ sagði Valdepenas við Realmadrid TV. Real Madrid lítur á hann sem mikilvægan framtíðarleikmann, sem gæti gert Arsenal erfitt fyrir að fá hann frá spænska stórveldinu.