Íslenska landsliðið er á leið til Kanada í mars og mun þar mæta heimamönnum og Haítí í tveimur æfingaleikjum. Miðlar í Kanada segja frá.

Kanada mun mæta Íslandi og Túnis í Toronto í lok mars, í næstsíðasta landsleikjaglugga sínum fyrir heimsmeistaramótið sem fer fram á heimavelli í júní. Þetta hafa nokkrir heimildarmenn staðfest við TSN og er von á opinberri tilkynningu frá sambandinu þar í landi síðar í vikunni.

Auk Kanada mun HM-undankeppnislið Concacaf, Haítí, sem er í 84. sæti heimslistans, einnig ferðast til Toronto til að spila við Ísland og Túnis. Kanada lagði áherslu á að báðir vináttuleikirnir í mars færu fram innanlands og þurfti því aukalið til að tryggja að Ísland og Túnis fengju tvo leiki í glugganum.

Túnis er í 41. sæti heimslistans og féll nýverið úr leik í sextán liða úrslitum Afríkukeppninnar. Liðið undirbýr nú sína þriðju Heimsmeistarakeppni í röð og mun á HM leika í F-riðli gegn Japan, Hollandi og sigurvegara úr umspili UEFA Path B. Túnis leikur fyrsta HM-leik sinn 14. júní í Texas.

Ísland er í 74. sæti heimslistans og endaði í þriðja sæti í undankeppni HM, á eftir Frakklandi og Úkraínu.

Marsglugginn verður mikilvægur fyrir undirbúning Kanada undir stjórn Jesse Marsch fyrir HM. Nokkrir lykilleikmenn gætu snúið aftur, þar á meðal bakvörðurinn Alistair Johnston og miðvörðurinn Moïse Bombito. Mest athygli beinist þó að stöðu Alphonso Davies og hvort fyrirliðinn snúi loks aftur í keppnisleik, ári eftir alvarleg meiðsli.