Ungstirnið Manchester United, Ayden Heaven, hefur flutt inn á fyrrverandi heimili Sir Alex Ferguson, þrátt fyrir að hafa aðeins leikið 17 leiki með aðalliði félagsins.

Heaven, sem er 19 ára varnarmaður, leigir nú stórglæsilegt setur í Cheshire þar sem Ferguson bjó með eiginkonu sinni, Cathy, áður en hún lést í október 2023.

Samkvæmt enskum blöðum er hinn ungi leikmaður staðráðinn í að vera til fyrirmyndar á heimilinu, enda vill hann fyrir alla muni forðast að styggja goðsögnina.

Ferguson, sem er nú 83 ára, var frægur fyrir að skamma leikmenn sína af miklum ákafa, þar á meðal David Beckham. Hugtakið „hairdryer treatment“ var upphaflega notað af fyrrverandi United-framherjanum Mark Hughes, þó Ferguson hafi sjálfur haldið því fram að hann hafi aðeins gripið til slíkrar framkomu örfáum sinnum.

Heaven gekk til liðs við Manchester United frá Arsenal í janúar í fyrra og skrifaði undir fjögurra og hálfs árs samning. Hann býr nú í húsinu ásamt móður sinni, Lísu, sem hefur haft virkt hlutverk í að styðja við feril hans.

„Ayden veit vel hver átti húsið og mun haga sér eftir því,“ sagði heimildarmaður enskra blaða.

„Hann er skynsamur strákur og vill einbeita sér að fótboltanum. Það sýnir líka hversu vel borgaðir ungir leikmenn eru orðnir, að hann geti flutt í fyrrum heimili Ferguson með svo fáa leiki að baki.“

Vonast er til að dvölin í húsinu verði honum innblástur og að ferill hans hjá United verði jafn farsæll og sá sem hófst þar fyrir áratugum síðan.