Jamie Carragher, fyrrum varnarmaður Liverpool og núverandi sparkspekingur, gagnrýndi Mohamed Salah og Cody Gakpo harðlega eftir nauman 1-0 sigur liðsins gegn Nottingham Forest á útivelli.

Liverpool virtist vera að missa dýrmæt stig í baráttunni um sæti í Meistaradeild Evrópu, en Alexis Mac Allister tryggði liðinu dramatískan sigur með marki á 97. mínútu.

Carragher var langt frá því að vera sáttur við frammistöðu liðsins á City Ground og sagði hana meðal þeirra verstu sem hann hefði séð frá Liverpool á tímabilinu. Hann hrósaði hins vegar unga leikmanninum Rio Ngumoha, sem kom inn á sem varamaður á 77. mínútu.

„Þetta er eitt mesta rán sem ég hef séð í ensku úrvalsdeildinni á þessu tímabili,“ sagði Carragher á Sky Sports.

„Ngumoha kom inn á og gerði meira á 15 mínútum en Salah og Gakpo gerðu allan leikinn. Hann breytti leiknum og á að vera í byrjunarliðinu héðan í frá.“

Carragher beindi einnig spjótum sínum að Curtis Jones og sagði hann taka of margar snertingar á boltanum.

„Þetta hefur verið vandamál hjá honum allan hans feril hjá Liverpool. Hann vill alltaf hafa of mikinn tíma á boltanum og þarf að vera beittari,“ bætti Carragher við.