Anthony Gordon stal senunni þegar Newcastle United vann stórsigur á Qarabag í fyrri leik liðanna í umspili Meistaradeildarinnar.

Gordon skoraði fjögur mörk í fyrri hálfleik, tvö úr opnum leik og tvö úr vítaspyrnum, og varð fyrsti leikmaður Newcastle til að skora fjögur mörk í Evrópuleik í sögu félagsins.

Aðeins Kylian Mbappe hefur skorað meira í Meistaradeildinni á tímabilinu en Gordon, sem er 24 ára.

Það er strax farið að ræða framtíð Gordon í erlendum miðlum í dag og hann til að mynda mátaður við Liverpool. Talið er að Newcastle myndi ekki setjast að samningaborðinu nema fyrir upphæð í kringum 90 milljónir punda.

Það yrði þungt högg fyrir stuðningsmenn Everton að sjá Gordon fara til erkifjendanna í Liverpool, en hann ólst upp hjá þeim og spilaði í bláu treyjunni áður en hann fór til Newcastle 2023. Hann spilaði þó vissulega í akademíu Liverpool til 11 ára aldurs.