Manchester City er sagt vera farið að undirbúa lífið eftir Pep Guardiola og hefur samkvæmt Telegraph sett saman þriggja manna lista yfir mögulega arftaka. Framtíð Guardiola á Etihad er sögð óljós eftir sveiflukennt gengi liðsins.
Samkvæmt Telegraph telja forráðamenn City að Guardiola gæti sagt upp störfum í sumar.
City hefur aðeins unnið einn deildarleik árið 2026 og er nú sex stigum á eftir Arsenal í toppbaráttunni. Liðið gerði jafntefli við Tottenham eftir að hafa misst niður 2-0 forystu, sem jók umræðuna um stöðu stjórans.
Á meðal þeirra sem nefndir eru sem mögulegir arftakar er Xabi Alonso, sem nýlega lét af störfum hjá Real Madrid. Þá er Enzo Maresca einnig orðaður við starfið, en hann hefur áður starfað hjá City.
Loks er Cesc Fabregas nefndur til sögunnar eftir góðan árangur með Como á Ítalíu. Guardiola á samning til 2027, en vangaveltur um næstu skref hans fara vaxandi.
