Santi Cazorla, fyrrum leikmaður Arsenal, hjálpaði uppeldisfélagi sínu Real Oviedo upp í La Liga, efstu deild Spánar, með sigri í úrslitaleik B-deildarinnar í gær.

Oviedo tók á móti Mirandes í seinni leik liðanna í úrslitaleik umspilsins, en fyrri leiknum lauk með 1-0 sigri Mirandes, sem einnig komust yfir í gær.

Þá sneri Oviedo dæminu hins vegar við og vann 3-1. Hinn fertugi Cazorla skoraði jöfnunarmarkið af vítapunktinum. Félagið er komið upp í efstu deild í fyrsta sinn í 24 ár.

Cazorla gekk í raðir Oviedo á ný árið 2023 eftir frábæran feril með Arsenal, Villarreal og Malaga. Hann vildi spila frítt fyrir félag en mátti það ekki og þiggur hann því lágmarkslaun, sem er undir milljón á mánuði á þessu stigi spænska boltans.

Það sem gerir afrek Cazorla enn aðdáunarverðara er sú staðreynd að hann hefur þurft að gangast undir fjölda aðgerða vegna bakteríusýkingar sem varð næstum til þess að hann missti fótinn.

Áfram hefur kappinn haldið á ástríðunni og nú er spurning hvort hann taki slaginn með Oviedo í La Liga.

Cazorla er án efa frægastur fyrir tíma sinn hjá Arsenal, þar sem hann lék frá 2012 til 2018. Vann hann enska bikarinn í þrígang á þeim tíma.