Jón Gnarr greindi frá því á dögunum að hann væri orðinn ÍR-ingur í fótboltanum hér á landi. Spilar nafnið og sagan þar inn í.

Jón valdi sér lið til að halda með á dögunum en er ekki hrifinn af orðinu knattspyrna, vill heldur nota orðið fótbolti. Því lá vel við að velja ÍR, Reykjavíkurlið sem ber ekkert slíkt í nafni sínu.

Jón og Sigurjón Kjartansson fóru nánar yfir þetta í hlaðvarpi Tvíhöfða. Þar benti sá síðarnefndi til að mynda á að ÍR væri í Breiðholti, hvergi nærri Vesturbænum, þar sem Jón hefur búið í fjölda ára. Benti Jón þá á að upphaflega hafi ÍR verði miðsvæðis.

„Gleymum ekki sögunni, sagan fylgir þér alltaf. Ég er orðinn ÍR-ingur og er búinn að fara á leik. Ég á ÍR-treyju, ég mun fá mér ÍR-húfu,“ sagði Jón, sem hefur hingað til ekki haft mikið dálæti á knattspyrnu.

Hann var heiðursgestur á sigri ÍR í nágrannaslagnum við Leikni í Lengjudeild karla á dögunum. Það var hvergi nær síðasti leikurinn sem þingmaðurinn mætir á þetta sumarið ef marka má orð hans.

„Þarna ætla ég að venja komur mínar. Ég ætla að kaupa mér árskort og fá að njóta þess að vera fótboltaáhugamaður,“ sagði Jón enn fremur í þættinum.