Leikmenn ÍBV voru allt annað en sáttir með dómgæslu Twana Khalid Ahmed í tapi gegn Val í 8-liða úrslitum Mjólkurbikars karla í gær.
Leiknum lauk með 0-1 sigri Vals, en Hólmar Örn Eyjólfsson gerði markið. Eyjamenn vildu fá að minnsta kosti eina vítaspyrnu í leiknum, jafnvel tvær.
Margir eru á því að þeir hafi eitthvað til síns máls þegar kemur að því þegar Bjarni Mark handlék knöttinn innan teigs, en ekkert var dæmt.
Markaskorarinn Hólmar fékk boltann einnig í höndina í leiknum en það atvik virkar öllu umdeilanlegra.
„Ég veit ekki hvernig er dæmt þegar þú ert að styðja þig við jörðina og boltinn neglist í höndina á þér. Ég veit ekki hvernig þessar reglur eru í dag,“ sagði Hólmar um atvikið við RÚV eftir leik.
Alex Freyr Hilmarsson fyrirliði ÍBV var spurður út í dómgæsluna eftir leik.
„Klárlega víti. Ég átti nokkrar samræður við dómarann í gegnum leikinn. Mér fannst þetta ógeðslega lélegt. Þeir fengu eitt gult spjald í leiknum en við einhver sex. Þeir brjóta samt endalaust á okkur, svipuð brot, vítin. Eigum við ekki að stoppa þar bara.“
Hér að neðan má sjá bæði atvikin.
Viðurkennir hendi en „Ég veit ekki hvernig þessar reglur eru í dag,“ sagði Hólmar. Og Alex Freyr um hitt „ekki vítið“ „Þetta var klárlega víti. Ég átti nokkrar samræður við dómarana og mér fannst þetta vera ógeðslega lélegt.“ 👀Sjáðu atvikin. Voru þetta víti?📺 pic.twitter.com/uDC1Wq78Gc
— RÚV Íþróttir (@ruvithrottir) June 19, 2025
