Jesse Lingard segir að það hafi ekki verið hans ákvörðun að ganga í raðir Nottingham Forest á frjálsri sölu árið 2022.

Lingard gekk frítt í raðir Forest eftir dvöl hjá Manchester United en hann var tímabilið fyrir á láni hjá West Ham þar sem honum gekk mjög vel.

Englendingurinn kennir ónefndum aðilum um það að hann hafi endað hjá Forest en hann vildi sjálfur fara til West Ham.

Lingard stóðst alls ekki væntingar hjá Forest og mistókst að skora deildarmark í 17 leikjum.

,,Þegar ég gekk í gegnum þessa tíma hjá Forest – ég vil ekki fara út í of mörg smáatriði en ég fékk ekki að stjórna neinu þarna, ég hafði engra kosta völ,“ sagði Lingard.

,,Ég vissi sjálfur hvað ég vildi gera og vissi að það væri tilboð á borðinu frá West Ham og svo Forest – ég var búinn að ákveða hvert ég vildi fara.“

,,Mér fannst ég ekki fá að ráða neinu um eigin framtíð og gat ekki tjáð mig. Þetta fólk vildi ekki það besta fyrir mig – ég fór augljóslega ekki til West Ham og endaði hjá Forest.“