UEFA skoðar reglubreytingar í kjölfar þess að vítaspyrna Julian Alvarez var dæmd ógild í seinni leik leik Atletico Madrid gegn Real Madrid í 16-liða úrslitum Meistaradeildarinnar í gær.

Conor Gallagher skoraði eina mark leiksins og jafnaði þar með einvígið fyrir Atletico en framlengingu og síðar vítaspyrnukeppni þurfti svo til að skera úr um sigurvegara. Þar hafði Real betur þar sem Atletico klikkaði á tveimur spyrnum sínum en Real einni.

Önnur spyrna Atletico sem um ræðir var þó ótrúleg óheppni. Julian Alvarez rann þá og var spyrnan dæmd ógild þar sem hann snerti boltann tvisvar áður en hann fór í markið. VAR komst að þessari niðurstöðu og hefur hún þótt umdeild á meðal einhverra, en það er þó útlit fyrir að ákvörðunin hafi verið rétt.

UEFA ætlar hins vegar nú að ræða við FIFA og æðstu menn fótboltans um hvort það eigi að dæma mörk eins og hjá Alvarez af ef augljóst er að seinni snertingin er algjört óviljaverk.

Það er því hugsanlegt að í framtíðinni myndi mark eins og hjá Alvarz í gær standa. Hefði það getað gjörbreytt niðurstöðu einvígisins.