Þetta segir reynsluboltinn í samtali við RÚV. Arnar Gunnlaugsson, nýr landsliðsþjálfari Íslands, tilkynnti í gær að hinn tvítugi Orri, sem er á mála hjá Real Sociedad, tæki við bandinu. Tilkynnti hann enn fremur að Hákon Arnar Haraldsson væri nýr varafyrirliði.
„Ég vissi alveg að hann hafði hugmyndir um annað og eins og hann útskýrði líka vel að ég þarf ekki fyrirliðaband til að vita að ég er leiðandi í þessum hóp. Þetta er svipuð staða og ég var í þegar ég tók við bandinu og Orri og Hákon vita það að ég er til staðar fyrir þá þegar þeir vilja. Ég held þetta sé rétt þróun. Þetta kannski lætur þá axla meiri ábyrgð og ég var hlyntur þessari hugmynd frá byrjun,“ segir Aron við RÚV.
Einhverjir hafa gagnrýnt að Aron sé landsliðshópnum fyrir komandi leiki gegn Kósóvó. Aron er á mála hjá Al-Gharafa í Katar en er aðeins skráður í Meistaradeildarhóp liðsins, en þar er Al-Gharafa úr leik. Hann lék með Þór í Lengjudeildinni hér heima síðasta sumar.
„Ég er orðinn vanur þessari gagnrýni. Ég hef verið að spila vel í Meistaradeildinni hér í Asíu og æfa 100% þannig að ég er klár. Ég hef í raun sjaldan verið hungraðri en akkúrat þessa stundina í að sýna mig og sanna,“ segir Aron.
