Mohamed Salah hefur þénað gífurlegar upphæðir frá því hann skrifaði undir nýjan tveggja ára samning við Liverpool í apríl en framtíð hans á Anfield er nú í uppnámi eftir gagnrýni hans eftir 3-3 jafnteflið gegn Leeds um helgina.

Salah, 33 ára, sakaði Arne Slot um að kasta sér fyrir rútuna og sagði að engin samskipti væru lengur á milli þeirra. Hann lét einnig að því liggja að hann gæti yfirgefið félagið í janúar.

Útspil hans kom á óvart þar sem aðeins átta mánuðir eru liðnir síðan hann hafnaði Sádi-Arabíu og skrifaði undir nýjan samning sem tryggir honum um 400 þúsund pund á viku.

Samkvæmt enskum fjölmiðlum hefur Salah þegar þénað um 14 milljónir punda síðan samningurinn tók gildi.

Það jafngildir yfir 586 þúsund pundum fyrir hvern þeirra 26 leikja sem hann hefur spilað og um 6.500 pundum fyrir hverja mínútu á vellinum. Salah hefur skorað sjö mörk á þessu tímabili, sem þýðir að Liverpool hefur greitt um tvær milljónir punda fyrir hvert mark.

Tengsl leikmanns og félags virðast nú á tímamótum og ljóst að næstu dagar gætu ákvarðað hvort Salah spilar meira með Liverpool eða fer nýja leið í janúar.