Fótboltatímaritið FourFourTwo spáði því árið 2021 hvernig byrjunarlið Englands myndi líta út á heimsmeistaramótinu 2026 og er áhugavert að skoða það í dag.
England er þegar komið á mótið en undankeppninni er þó ekki lokið. FourFourTwo spáði því að bæði Trent Alexander-Arnold og Mason Mount yrðu í byrjunarliðinu á HM, en hvorugur þeirra er í hópi Tuchels fyrir komandi leiki. Alexander-Arnold hefur átt erfitt uppdráttar hjá Real Madrid eftir flutninginn frá Liverpool og Mount er ekki valinn eftir erfiðan tíma hjá Manchester United.
Þeir sem tímaritið spáði rétt til um eru Marc Guehi, Declan Rice, Jude Bellingham, Bukayo Saka og Phil Foden, en allir eru líklegir til að vera hluti af byrjunarliðinu í Norður-Ameríku næsta sumar ef þeir haldast heilir.
Að sama skapi spáði tímaritið því að Dean Henderson yrði markvörður Englands, fram yfir Jordan Pickford. Það er ólíklegt en allar líkur á að Henderson fari þó með sem varamarkvörður.
FourFourTwo tippaði einnig á að Ben White, Ryan Sessegnon og Mason Greenwood yrðu í byrjunarliðinu, sem virðist nú mjög ólíklegt. White hefur ekki verið í landsliðshópi síðan í mars 2024, Sessegnon hefur aldrei leikið A-landsleik og Greenwood er ekki í myndinni hjá Tuchel.
Svona spáði FourFourTwo því að liðið yrði:
Dean Henderson
Trent Alexander-Arnold
Ben White
Marc Guehi
Ryan Sessegnon
Declan Rice
Jude Bellingham
Mason Mount
Bukayo Saka
Mason Greenwood
Phil Foden
