UEFA mun í næstu viku tilkynna um það hvort Crystal Palace hafi þátttökurétt í Evrópudeildinni á næstu leiktíð eður ei. Sky Sports segir frá.

Palace vann sér inn þátttökurétt í Evrópudeildinni á næstu leiktíð með því að vinna enska bikarinn, sinn fyrsta stóra titil, í vor. Eins og staðan er núna má liðið hins vegar ekki taka þátt þar vegna eignarhalds John Textor.

Hann á 43 prósent í Palace en á einnig hlut í franska félaginu Lyon, sem vann sér inn þátttökurétt í Evrópudeildinni einnig. Ekki er heimilað að eiga meira en eitt félag í sömu keppni. Verði Palace dæmt úr Evrópudeildinni gengur heldur ekki að liðið verði fært niður í Sambandsdeildina. Er það vegna þess að David Blitzer, sem einnig á hlut í félaginu, er meirihlutaeigandi í danska stórliðinu Bröndby, sem tekur þátt í keppninni.

Í vikunni var hins vegar greint frá því að Textor væri búinn að samþykkja að selja allan sinn hlut til Bandaríkjamannsins Woody Johnson, sem er eigandi ameríska fótboltaliðsins New York Jets, í þeirri von að Palace fái að taka þátt í Evrópudeildinni.

Fleira markvert hefur þá átt sér stað síðan en Lyon var fellt niður í frönsku B-deildina vegna fjárhagsvandræða. Það þýðir að liðið missir þátttökurétt í Evrópudeildinni. Útlitið er því sagt gott fyrir Palace, en niðurstaða mun liggja fyrir í næsta mánuði.

Meira
Klúðrið á bak við tjöldin hjá Palace: Óvissa ríkir en hugsanleg lausn í sjónmáli