Það eru afskaplega góðar líkur á því að Manchester United muni reka Ruben Amorim fyrir jól ef hann nær ekki að snúa gengi enska liðsins við snemma næsta tímabil – þetta segir fyrrum þjálfari hjá félaginu.

Amorim tók við United í nóvember í fyrra af Erik ten Hag en gengi liðsins versnaði undir hans stjórn og var liðið alls ekki sannfærandi.

Rene Meulensteen, fyrrum þjálfari hjá enska stórliðinu, segir að þolinmæðin sé lítil á Old Trafford og að Amorim þurfi að skila úrslitum eða þá fá sparkið.

,,Ef þetta gengi heldur áfram þá verður Amorim rekinn fyrir jól,“ sagði Meulensteen um stöðuna.

,,Ef þetta heldur áfram til lok árs þá er hann undir mikilli pressu. Stjórn félagsins hefur ekki annað val en að ræða hvort hann sé rétti maðurinn til að sigla þessu skipi.“

,,Eftir síðasta tímabil, miðað við það þá er gríðarlega mikilvægt að hann byrji vel í vetur.“