Fyrrum landsliðsmaðurinn Jón Daði Böðvarsson er að flytja aftur heim til Íslands eftir næstum áratug á Englandi.
Þessi 33 ára gamli sóknarmaður var hjá Burton eftir áramót og hjálpaði liðinu að halda sér uppi í ensku C-deildinni.
Selfyssingurinn lék einnig með Wrexham, Bolton, Millwall, Reading, Wolves, Kaiserslautern og Viking í atvinnumennsku.
Nú er hann á leið heim til Íslands en er ekki búinn að leggja skóna á hilluna ef marka má yfirlýsingu hans á samfélagsmiðlum.
„Takk Burton fyrir stuttan en eftirminnilegan tíma. Mig langaði að gera eitthvað jákvætt í fótboltanum áður en ég flyt aftur heim og vonandi gerði ég það að einhverju leyti.
Eins mikið og mig langar til að vera áfram tel ég að þetta sé rétti tíminn til að flytja aftur til Íslands eftir næstum tíu ár á Englandi og 13 erlendis. Vonandi skiljið þið ákvörðun mína,“ skrifar Jón Daði.
„Ferðalag mitt mun halda áfram, bara ekki erlendis. Takk fyrir allt.“
Jón Daði á 64 A-landsleiki að baki fyrir Íslands hönd og var hluti af liðinu sem fór á EM 2016 og HM 2018.
