Öll vötn virðast renna til þess að Jóhannes Karl Guðjónsson taki við sem þjálfari karlaliðs ÍA á nýjan leik og eru sögusagnir um að hann muni taka leikmann með sér frá Danmörku.

Fyrr í vikunni var tilkynnt að Jón Þór Hauksson og knattspyrnudeild ÍA hefðu slitið samstarfi sínu eftir dapurt gengi það sem af er móti í Bestu deildinni. Skagamenn eru á botninum með níu stig.

Jóhannes er þjálfari AB Kaupmannahafnar í dönsku C-deildinni og eru Ágúst Eðvald Hlynsson og Ægir Jarl Jónasson þar á mála. Sparkspekingurinn Hrafnkell Freyr Ágústsson greindi frá því í Dr. Football að Jóhannes hyggðist taka þann síðarnefnda með sér upp á Skaga. Er þessi 27 ára gamli leikmaður sagður opinn fyrir því að snúa aftur til Íslands eftir ársdvöl í dönsku höfuðborginni.

Jóhannes Karl stýrði ÍA einnig frá 2018 til 2021, áður en hann gerðist aðstoðarþjálfari íslenska karlalandsliðsins, þaðan sem hann hélt svo til Danmerkur.