Erik ten Hag, nýr stjóri Bayer Leverkusen, horfir til Englands í leit að arftaka Florian Wirtz.
Wirtz, sem er einn allra besti leikmaður Leverkusen, er á leið til Liverpool á yfir 100 milljónir punda og skilur stórt skarð eftir sig.
Ten Hag, sem er auðvitað fyrrum stjóri Manchester United, telur Jack Grealish hjá sínum fyrrum nágrönnum í Manchester City fullkominn til að koma í hans stað.
The Sun segir frá þessu, en Grealish virðist algjörlega úti í kuldanum hjá Manchester City.
Grealish, sem kom til City fyrir 100 milljónir punda árið 2021, hefur verið orðaður við lið eins og Aston Villa, Everton, Newcastle, West Ham og Napoli undanfarið.
Ljóst er að City fær hvergi nálægt 100 milljónum punda fyrir hann aftur en talið er að félagið yrði sátt við um 40 milljóna punda sölu.
