Marc-Andre ter Stegen er brjálaður út í félagslið sitt Barcelona sem er á eftir markverðinum Joan Garcia sem spilar með Espanyol.

Þetta kemur fram í spænska miðlinum Sport en Ter Stegen virðist ekki eiga framtíð fyrir sér hjá Börsungum og var á bekknum undir lok síðasta tímabils.

Markvörðurinn hefur ekki leitast eftir því að komast burt frá Barcelona en hann verður mögulega fjórði í röðinni næsta vetur á eftir Garcia, Wojciech Szczezny og Inaki Pena.

Ter Stegen var um tíma talinn einn besti markvörður heims en eftir að hafa meiðst í ágúst í fyrra hafa hlutirnir ekki gengið upp hjá Þjóðverjanum.

Ter Stegen ku vera hundfúll með ákvörðun Barcelona að semja við Garcia og vill á einhvern hátt meina að það sé hrein árás á hans stöðu hjá félaginu.

Þýski landsliðsmarkvörðurinn spilaði aðeins níu leiki á síðasta tímabili en hann er enn aðalmarkvörður þýska landsliðsins.