„Ég vil bara heiðarlega leikmenn sem vilja leggja sig fram,“ segir Ben Foster fyrrum markvörður Manchester United þegar hann er spurður út í Alejandro Garnacho.

Garnacho hefur málað sig út í horn á Old Trafford og vill Ruben Amorim losa sig við kappann.

Hugarfar Garnacho hefur verið gagnrýnt og sú staðreynd að hann virðist uppteknari af eigin ágæti en ágæti liðsins.

„Það er best fyrir United að losa sig við hann, ef ég væri stjóri þá væri ég líkur Amorim á þá vegu að ég vil liðsmenn í mitt lið,“ segir Foster.

„Ég vil góða, heiðarlega og duglega leikmenn í mitt lið. Ég fæ ekki þá tilfinningu með Garnacho, það eru nokkrir þannig leikmenn hjá United.“

Foster tók svo dæmi um úrslitaleik Evrópudeildarinnar þar sem Tottenham vann United 1-0.

„Þú horfir á endalok úrslitaleiksins, þar fer Brennan Johnson í viðtal. Hann hafði ekki farið í klippingu í fleiri mánuði, hann gaf frábært viðtal og þú sást hversu auðmjúkur hann var. Hann leggur mikið á sig og gerir allt fyrir liðið.“

„Þú horfir á Garnacho sitjandi á vellinum, hann fór í klippingu daginn fyrir leik og lét aflita það.“