Leiknir Reykjavík hefur ákveðið að gera breytingu á þjálfara sínum eftir aðeins fimm leiki í deild í sumar.

Ólafur Hrannar Kristjánsson hefur verið rekinn frá félaginu sem er í neðsta sæti næst efstu deildar með eitt stig.

Gengið hefur verið afskaplega lélegt í sumar en liðið hefur skorað fjögur mörk og fengið á sig heil 18.

Leiknir hefur fengið á sig 12 mörk í síðustu tveimur leikjum og eina stig liðsins kom gegn Þrótt í fyrstu umferð.

Tilkynning Leiknis:

Íþróttafélagið Leiknir hefur tekið þá ákvörðun að slíta samstarfi við Ólaf Hrannar Kristjánsson, þjálfara meistaraflokks.

Þessi ákvörðun er mjög þungbær. Óli er mikill Leiknismaður og honum er þakkað góð störf eftir að hafa tekið við liðinu í erfiðri stöðu á síðasta ári.

Félagið tilkynnir um frekari fréttir af þjálfaramálum þegar þau mál skýrast.