Arnar Gunnlaugsson segir að það hafi verið erfitt verkefni að velja fyrsta landsliðshóp sinn. Hann telur 40-50 leikmenn geta verið í þessum hópi.
Arnar segist hafa ákveðið að fylgja eigin sannfæringu og sökum þessu séu fáir miðverðir í hópnum. Hann telur fjölhæfni mikilvægan kost.
„Það er mjög spennandi, það var áskorun að vera hinu megin við tjaldið. Maður hefði verið hinu megin við að kvarta yfir því að Jón væri ekki í hópnum fyrir Sigga, það er erfitt að velja hópinn. Við eigum fjölda af öflugum leikmönnum, 40 til 50 manna sterkur hópur. Það eru nokkuð margir sem fá að bíta í það súra epli að vera heima í þetta skiptið,“ sagði Arnar um fyrsta hóp sinn.
Meira:
Svona er fyrsti landsliðshópur Arnars: Jóhann Berg ekki með – Aron Einar í hópnum en ekki Gylfi
Hann ákvað að fylgja eigin sannfæringu og telur að leikmenn þurfi að geta leyst fleiri en eina stöðu til að vera í hópnum.
„Það var að vera ruthless, vera trúr minni sannfæringu hvernig ég sé hlutina fyrir mér. Það eru ekki beint margir natural varnarmenn í hópnum, ég var að senda þau skilaboð að ég vildi meiri sveigjanleika í leikmönnum. Menn sem geta spilað nokkrar stöður, ekki fara í það að velja tvo hægri bakverði og þar fram eftir. Það var áskorun, á sama tíma mjög skemmtilegt.“
