Þorsteinn Halldórsson, þjálfari íslenska kvennalandsliðsins, var nokkuð sáttur með stig á útivelli gegn Sviss í fyrsta leik Þjóðadeildarinnar í kvöld.
Leikurinn var bragðdaufur og lauk honum með markalusu jafntefli.
„Mér fannst við fín í fyrri hálfleik, gerðum ágætlega á köflum. Mér fannst við byrja seinni hálfleikinn illa, tapa boltanum á slæmum stöðum og gáfum þeim sjálfstraust, þó þær hafi ekki skapað neitt. Seinni hálfleikur var ekki nógu góður og það þurfum við að fara yfir,“ sagði Þorsteinn við RÚV eftir leik.
Þorsteinn vildi sjá íslenska liðið nýta sína sénsa betur.
„Við komumst í einn á einn stöður á risaplássum oft. Maður var að vonast til að geta nýtt okkur það betur því við komum okkur í góðar stöður.“
Þorsteinn var spurður að því hvort hann hefði þegið stigið á útivelli fyrirfram.
„Já því þetta eru allt góð lið sem við erum að keppa við. Auðvitað vill maður vinna en stig er ekki slæmt,“ sagði hann, en Frakkar og Norðmenn eru einnig í riðli Íslands.
