Sigurður Gísli Bond Snorrason mætti til Helga Fannars og Hrafnkels Freys í nýjasta þátt Íþróttavikunnar á 433.is. Besta deild karla var í fyrirrúmi.
Víkingi mistókst að verja Íslandsmeistaratitil sinn á síðustu leiktíð, sem og bikarmeistaratitilinn. Liðið er þó komið alla leið í útsláttarkeppni Sambandsdeildarinnar. Víkingur seldi þá lykilmann sinn Gísla Gottskálk Þórðarson til Lech Poznan í Póllandi á dögunum.
„Það er risastórt skarð að fylla. Hann var bara besti leikmaður deildarinnar, fáránlega góður. Ég held það verði samt ekki eitthvað rugl erfitt að fylla þetta skarð,“ sagði Sigurður.
Umræðan snerist þá að þeim mönnum sem Víkingur hefur fengið í félagaskiptaglugganum.
„Eini sem er hægt að stóla á að verði góður er Daníel Hafsteinsson. Sveinn Margeir verður í stuttan tíma hérna. Stígur Diljan mun taka tíma, hann er 2006 módel. Atli Þór Jónasson er í baráttu við Helga Guðjónsson og Nikolaj Hansen,“ sagði Hrafnkell.
Þá urðu auðvitað þjálfaraskipti hjá Víkingi. Arnar Gunnlaugsson hefur yfirgefið félagið og er tekinn við sem landsliðsþjálfari. Aðstoðarmaður hans Sölvi Geir Ottesen er tekinn við í Víkinni.
„Það er fínt fyrir Sölva að hann er að koma að einhverju leyti pressulaus inn í þetta,“ sagði Sigurður.
Hrafnkell líkti þessu við þegar Halldór Árnason tók við Breiðabliki af Óskari Hrafni Þorvaldssyni, eftir að hafa verið aðstoðarmaður hans í mikilli velgengni í Kópavoginum.
„Þetta er eins og með Dóra Árna í fyrra. Það var enginn að tala hann (í samhengi við að verða Íslandsmeistari).“
Umræðan í heild er í spilaranum.
